Ўзбекистон Республикаси Вазирлар Маҳкамасининг 2022 йил 25 февралдаги 88-сон “Фаолиятни бошлаш ёки тугатиш учун ваколатли органни хабардор қилиш тартиби тўғрисидаги ягона низомни тасдиқлаш ҳақида”ги қарори қабул қилинди.

Мазкур қарорнинг 3-иловаси билан Ўзбекистон Республикаси Ҳукуматининг айрим қарорларига ўзгартириш ва қўшимчалар киритилди.

Жумладан, Вазирлар Маҳкамасининг 2008 йил 28 июлдаги 161-сон қарори билан тасдиқланган “Баҳолаш тўғрисидаги ҳисоботларнинг ҳаққонийлигини экспертизадан ўтказишни ташкил этиш тартиби ҳақида”ги низомда “баҳолаш фаолиятини амалга ошириш ҳуқуқига лицензияга эга бўлган,” сўзлари “рўйхатдан ўтган баҳоловчи ташкилотларнинг профессионал жамоат бирлашмасига аъзо бўлган,” сўзлари билан алмаштирилди.

Шунингдек, ушбу қарорнинг 4-иловаси билан Ўзбекистон Республикаси Ҳукуматининг ўз кучини йўқотган деб эътироф этилган қарорлари рўйхатига Вазирлар Маҳкамасининг 2003 йил 8 майдаги “Баҳолаш фаолиятини лицензиялаш тўғрисида” 210-сон қарори ҳамда Вазирлар Маҳкамасининг 2011 йил 10 майдаги “Риэлторлик фаолиятини лицензиялаш тўғрисидаги низомни тасдиқлаш ҳақида” 129-сон қарорлари киритилди.